காதல் காதல் காதல் காதல் போயின் .( மீதிக் கதை)

காதல் காதல் காதல் காதல்  போயின் ( திடங்கொண்டு போராடு )
   -------------------------------------------------------------------------------------
என் பதிவில்/ இப்படிக்கண்டதும் காதல் என்பதில் உனக்கு உடன் பாடா” என்று பாபு
கேட்டான். அந்த நிமிஷத்தில் அவன் வாயில் சனி இருந்திருக்க வேண்டும் என்று முடித்திருந்தேன்


( தொடர்ச்சி)

“இல்லை.  கண்டதும் காதல் என்பதில் எனக்கு உடன்பாடில்லை”

பின் என்னைச் சந்திக்க ஓடோடி வந்தாயே .. ஏன்.”

உங்கள் மேல் காதல் கொண்டு ஓடி வந்தேன் என்று நீங்கள் நினைத்தால் நான் பொறுப்பாக முடியுமா”

சந்தியா நான் ஆர்ர்வத்துடன் எழுதிக் கொடுத்த கடிதத்தை ஆவலுடன் வாசித்தாயே  அது பொய்யா.?

 வாசித்தேன் என்பது உண்மை. ஆவலுடன் வாசித்தேன் என்று எப்படி கூறுகிறீர்கள்”

பாபுவுக்கு சங்கடமாக இருந்தது. அழைப்பு விடுத்ததும் முன் பின் அறியாத பெண் ஏன் என்னைப் பார்க்க வந்தாள் என்று தெரிந்து கொண்டிருக்க வேண்டாமா. கண்டவுடன் காதல் என்று எப்படி தீர்மானித்தேன் என்று மனம்புழுங்கினான் இவன்மனதில் ஓடும் எண்ணங்களை அப்படியே உணர்ந்து கொண்ட சந்தியா

”பிறகு ஏன் வந்தேன் என்று எண்ணுகிறீர்கள் இல்லையா. பெண்கள் என்றாலே உங்களுக்கு எப்படியாவது அடைந்து விடலாம் என்ற எண்ணம். அதெப்படிக் கண்டதும் காதல்வரும் அதுவும் பெயர் கூடத்தெரியாத பெண்ணைக் காதல் என்று கூறி மயக்கலாம் என்று எண்ணுகிறீர்களா?நீங்கள் யரென்றே தெரியாத நான் உங்களை எப்படி விரும்ப முடியும்?இனக் கவர்ச்சி என்பது ஆண்களுக்கே உண்டு. பெண்கள் ஆழமானவர்கள்.  ஆழ்ந்தெரியாமல் காலைவிட்டு அவதிப்படும் காலம் அல்ல இது”

சந்தியா பேசப் பேச பாபுவுக்கு வருத்தம் தாங்க முடியவில்லை. சந்தியா கேட்டதிலும் இருந்த நியாயம் அவனை நிலைகுலைத்தது. உண்மையில் அவன் இனக் கவர்ச்சியால் ஈர்ப்பு கொண்டு சந்தியாவை நாடியிருந்தால் அவ்வளவு கவலைப் பட்டிருக்க மாட்டான் சந்தியாவிடம் தனக்கு ஏற்பட்டது புனிதமான காதல் என்று எப்படி அவளுக்குப் புரிய வைக்க முடியும்

“ சந்தியா என்னைத் தவறாகப் புரிந்து கொண்டாய். அது உனக்கும் தெரியும் இருமனம் இணைந்தால் திருமணம் என்றல்லவா நினைத்துக் கொண்டிருந்தேன். இருமனதிலும் இணைப்பு இருக்கிறதா என்று தெரிந்து கொள்ளவல்லவா உன்னை வரச் சொல்லிக் கூப்பிட்டேன். நீ வந்திருக்காவிட்டாலும் வருந்தி இருக்க மாட்டேன். ஆனால் வந்து என் புனிதமான அன்பைக் கொச்சைப் படுத்திப் பேசுகிறாயே அதைத்தான் தாங்க முடியவில்லை “ என்று கூறிக் கண்ணீர் வடித்தான்

“ அதெப்படி பாபு இருமனம் இணைந்தால் திருமணம் என்கிறீர்கள். நீங்கள் படித்தவர் என்றே எண்ணுகிறேன் தொல்காப்பியர் காலத்திலேயே சொல்லப் பட்டதை உங்களுக்குக் கூறுகிறேன்

”பிறப்பே, குடிமை, ஆண்மை, ஆண்டோடு உருவு, நிறுத்த காமவாயில் ,நிறையே, அருளே உணர்வோடு திருவென முறையுளக் கிளந்த ஒப்பினது வகையே” என்று தொல்காப்பியர் குறிப்பிடுகிறார்.”

 இப்பொழுதும் இளமை வனப்பு வளமை கல்வி அறிவு எனப் பல பொருத்தங்களும் சேர்ந்த மண வாழ்வுதான் சிறக்கிறது இருமனம் இணைந்தால் திருமணம் என்பதே தவறான கான்செப்ட். நீங்கள் எப்படிப்பட்டவர் என்று தெரிந்து கொள்ளவே இங்கு வந்தேன். ஆனால் கண்டதும் காதல் என்று கூறி என் மயக்கம் தெளிவித்தீர்கள் குட் பை. நான் வருகிறேன்“

என்று சொல்லி அவ்விடம் விட்டகன்றாள்

அவள் அங்கிருந்து போனதும் பாபுவுக்கு இருட்டிக் கொண்டு வருவது போல் தடுமாற்றம் அவள் வராமலேயே இருந்திருக்கலாம் வந்து தன் காதலைக் கொச்சைப் படுத்திப் பேசியதை அவனால் தாங்க முடியவில்லைகடைசியில் தன் காதல் அரை அமர காதல்தானா என்று  தட்டுத்தடுமாறி வீடு போய்ச் சேர்ந்தான். சந்தியாவின் பேச்சு அவானை ஒரு முடிவுக்குத் துரத்தியது

அளவுக்கு மீறிய தூக்க மாத்திரைகளை விழுங்கி அவன் நித்திரையிலிருந்து எழவே இல்லை.....

.

(என் விளக்கம்

சிறு கதை என்பது கற்பனையில் தோன்றும் நிகழ்வுகளைச் சொல்லிப் போவது. கற்பனை என்பது கட்டுக்குள் அடங்காதது. ஆனாலும் கதைகளை சொல்லும்போது கற்பனையிலும் ஒரு யதார்த்தம் வேண்டும்.நிகழ்வுகளை குறிக்கும் போது கதாபாத்திரங்களின் மனோபாவம் வெளிப்பட்டிருக்க வேண்டும் கதைகளை இப்படித்தான் தொடங்கி இப்படித்தான் முடிக்க வேண்டும் என்ற விதிகள் ஏதும் இருப்பதாகத் தெரியவில்லை. கதாபாத்திரங்களைப் படம் பிடித்துக் காட்டும்போது இவர்கள் இப்படி நடந்து கொள்வார்கள் என்று யூகிக்க இடமுண்டு. இவர்களின் நடவடிக்கைகள் இப்படியும் நடக்குமா என்பதை விட இப்படியும் நடக்கலாம் என்று சிந்தித்தே “காதல்,காதல், காதல், காதல் போயின்” என்னும் என் சிறுகதையின் முடிவை நிர்ணயித்தேன், இப்படி சிந்திப்பவர் இருக்கிறார்களா என்று அறியவே மீதிக்கதை எழுத வாசக நண்பர்களைக் கேட்டுக்கொண்டேன். நான் கதையில் பாபுவை எதையும் சிந்தித்து செயல் படாத ஒரு கோழை மனம் படைத்தவனாகக் காட்டினேன். கூடவே இக்காலப் பெண்கள் யதார்த்த வாதிகள் என்றும் கோடிகாட்டினேன். கதைகளை படித்துக் காதலுக்குப் புனிதத் தன்மை தரும் இளஞன் பாபு அப்படி அது நிறைவேறப் போவதில்லை என்று தெரிந்ததும் ஒரு தவறான முடிவை எடுக்கிறான் என்றும் முடித்திருக்கிறேன்  BOYS ARE IMPULSIVE: GIRLS ARE PRAGMATIC.) 

என் கதையைப் படித்து மீதிக்கதை எழுதி அனுப்பிய அனைவருக்கும் என் நன்றிகள், வாழ்த்துக்கள்...!
திரு. பாலகணேஷ் என்ன சொல்கிறார் பார்ப்போம்.