மீண்டும் தரம்.

                                     மீண்டும் தரம்
                                     ---------------------

தரம் பற்றிய ஒரு பரிசோதனை என்று ஒரு பதிவு சில நாட்களுக்கு முன் எழுதி இருந்தேன். பின்னூட்டங்களைப் பார்த்தபோது தரம் பற்றிய சரியான புரிதலுக்குப் பதிலாக அது நான் வாசகர்களை சோதிக்க எழுதியது என்றே பலரும் எண்ணியதாகத் தெரிந்தது.. பின்னூட்டங்களையும் அதற்காக நான் கொடுக்கும் மறு மொழிகளையும் பின்னூட்டமுட்டவர்கள் வாசிக்கிறார்களா தெரியவில்லை. திரு.திண்டுக்கல் தனபாலன் தரம் என்பது ISOவில் வேறு என்று எழுதி இருந்தார். எனக்குத் தெரிந்தவரை தரம் என்பது எல்லா இடங்களிலும் ஒன்றே, முதலில் தரம் என்பது என்ன என்னும் புரிதல் அவசியம் அதை ஓரளவுக்கு விளக்குகிறேன்

தினசரி  வாழ்வில்  சில விஷயங்களைப் பற்றி நிறையவே பேசுகிறோம்; கேள்விப்படுகிறோம். ஆனால் அந்த விஷயம் பற்றிய தெளிவு நமக்கு இருக்கிறதா என்பது சந்தேகமே. அப்படிப்பட்ட  ஒரு விஷயம் குவாலிடி  என்று  சொல்லப்படும்  தரம். உற்பத்தியாளர்களிடம்  தரம் பற்றிக்  கேட்டால்  கொடுக்கப்பட்டுள்ள   வரைமுறைக்குள்  இருப்பதே (Specification  limits ) தரம் என்பார்கள். வெகுஜனங்களிடம்  இது பற்றிக் கேட்டால் குறிப்பிட்டு  எந்த  பதிலும்  சரிவரக்  கிடைக்காது. பெரும்பாலோர்  தரம் பற்றிகருத்துக்  கூறுவது  ஏதோ  ஒரு யூகத்தின்  அடிப்படையிலேதான் .பலரும்  விளம்பரத்தின்  அடிப்படையிலேயே  தரம் பற்றிய எண்ணங்களைக்  கொள்கிறார்கள் .  

  ஒரு  பொருளோ சேவையோ   தரமாகஇருக்கிறதா  யில்லையா  என்பதை  நிர்ணயம் செய்யும் நமக்கு அந்தப் பொருளைப்  பற்றிய விஷய  ஞானமோ  சேயல்திறனோ  முழுவதுமாக இருப்பதில்லை. அதை  ஓரளவு  விளக்கவே  இந்தக்  கட்டுரை.

தரம் அல்லது குவாலிடி என்றால் என்ன.? உபயோகிப்பவரின் தேவையைப பூர்த்தி செய்யும் திறன்  அந்தப் பொருளுக்கோ சேவைக்கோ இருநதால் அது  தரமாக உள்ளது என்று   கொள்ளலாமா.? தேவையைப்  பூர்த்தி செய்வதே  தரம் என்றால், அரிசி  உளுந்து    அரைத்து ஆவியில்  எடுக்கும் இட்லிசெய்யும் பணிஒன்றுதான்.  பசியாற்றும்,.  பின்  எதற்காக  அதன்  விலை வெவ்வேறு   இடங்களில்  வித்தியாசமாய் இருக்கிறது.? கையேந்திபவனில்  கிடைப்பதும் இட்லிதான் , ஸ்டார் ஹோட்டலில்  கிடைப்பதும் இட்லிதான். அதே அரிசி மாவு உளுந்து  மாவு, ஆவியில் வேக வைத்ததுதான். இட்லி உண்பவருக்கு  பசியாற்றல் , வயிறு நிறைத்தல்  மட்டுமின்றி  வேறு  எதிர்பார்ப்புகளும்  உண்டு.  
ஒரு தொலைக்காட்சிப் பெட்டி  வாங்குகிறோம். அதில் செய்திகள், சினிமா, பாடல்கள்  பார்க்க  முடிகிறது. நம்மில்  பெரும்பாலோருக்கு  டி வி  எப்படி செய்யப்படுகிறது என்றோ எப்படி வேலை  செய்கிறது என்றோ தெரியாது. இருந்தாலும்  அந்தப் பெட்டியைவிட  இது நல்லது, இது மோசம், என்று எதை  வைத்துக் கூறுகிறோம். தொலைக்காட்சிப்   பெட்டியில்  படம்  பார்ப்பதைத்  தவிர  நமக்கு வேறு எதிர்பார்ப்புகளும்   உண்டு. இதே  போல்  ஒவ்வொரு  பொருளுக்கும்  அது செய்யும் பணியை விட, உபயோகிப்பவருக்கு  வேறு  எதிர்பார்ப்புகள் உண்டு என்று தெரிகிறது.

தரம் என்பதன் முதல் அர்த்தம் அது உபயோகிகப்படக் கூடியதாய் இருக்க வேண்டும்.It should be fit for use. ஆனால் அது மாத்திரம்  போதாது. கையேந்தி பவனில், நின்று   கொண்டு, இலையோ தட்டோ, கையில்  பிடித்துக்கொண்டு  உண்ண  வேண்டும். அது   பசியைப்  போக்கும் பணியைச் செய்துவிடும். அந்தத் தேவை மட்டும் போதுமென்று  வருபவர்கள் கையேந்திபவனில்  உண்பார்கள். அதற்கு  அவர்கள்  கொடுக்கும் விலையும் குறைவு. அதே இட்லி, ஸ்டார் ஹோட்டல்களில் , குளிர்சாதன  அறையில் நல்ல  இருக்கைகளில்  அமர்ந்தவுடன் , உங்களைப்  பெரிய  மனிதராகப்  பாவித்து,  உங்களுக்குச்  சேவை  செய்ய, சீருடை  அணிந்த வெயிட்டர்கள், மெனு  கார்டை  உங்களிடம்  கொடுத்து, கையில் பேனா  புத்தகத்துடன்  உங்கள்  ஆர்டரைப்  பதிவு  செய்து , சிறந்த  தட்டு , ஸ்பூன் , போர்க் , போன்ற  கருவிகளுடன்  இட்லியை  அதற்கு   துணையாகச  சட்டினி  மிளகாய்ப்பொடி, இத்யாதி  வகைகளையும்  வைக்கும்போது , உங்களைப்பற்றிய  உங்கள்  கணிப்பு , உங்கள் மதிப்பு  உயருகிறது . இங்கு  இட்லி பசி  போக்கும் பணியுடன்  உங்கள்  மதிப்பை  உயர்த்தும்  பணியையும்  கூடவே  செய்கிறது.அதற்கு  ஏற்றாற்போல்  நீங்கள் செலவு செய்யும்  தொகையும்  அதிகம். அப்படி  செலவு  செய்யும் மக்களும்  நிறையவே இருக்கிறார்கள். கையேந்திபவன்  இட்லிக்கும்  ஸ்டார்  ஹோட்டல்  இட்லிக்கும் இட்லியைப்  பொறுத்தவரை  பெரிய வித்தியாசங்கள்துவும் இல்லை. கையேந்திபவனில் இட்லி  உண்பவரின்  தேவையும்  ஸ்டார் ஹோட்டலில்  இட்லி உண்பவரின் தேவையும் வித்தியாசப்படுகின்றன. ஆகவே, வாடிக்கையாளரின் தேவையைப் பூர்த்தி செய்வதே தரத்தின்  முக்கிய நோக்கம். தேவைக்குத்  தக்கபடி  விலையும் வித்தியாசப்படும்

.
வாடிக்கையாளரின் எதிர்பார்ப்புகளை  பூர்த்தி செய்வதே   தரம்  என்று கொள்ளலாமா. ?எதிர்பார்ப்புகள்தான்  என்னவாக  இருக்கலாம்.? முக்கியமாக  நிர்ணயிக்கப்பட்ட  பணி நிறைவேற  வேண்டும். அதன் பிறகு  அதன் தோற்றம் , அது கொடுக்கப்படும்  விதம்    சேவை , அதன் விலை, (appearance, packing, service, reliability, price,) நம்பகத்தன்மை  போன்ற விஷயங்கள்  ஒரு பொருளின் தரத்தை  நிர்ணயம் செய்யும். இவை  எல்லாம் இருந்தாலும்  நமக்கு  தேவைப்பட்ட  நேரத்தில்  அந்தப் பொருள்  கிடைக்கா விடடால் பிரயோசனப்படாது. நிறைய  இடங்களில் வாங்கப்படும்  பொருள் பற்றிய விஷய   ஞானமே  இல்லாமல்  தரத்தைப் பற்றி நாம்  பேசுகிறோம். வாங்கும்  பொருளைப்  பற்றிய  நமது  தேர்வே  இறுதியானது. சந்தையில்  நமக்கு தேர்வு செய்ய சாய்ஸ்  நிறைய  இருநதால் அது வாங்குபவர்  சந்தையாகும். தேர்வு செய்ய வசதி  இல்லாமல் இருநதால் அது விற்பனையாளரின்  சந்தையாகிறது.  விற்கப்படும்  பொருளைப்பற்றியவிளம்பரம்வியாபாரத்தின் முக்கியஉத்தியாகும். ஆனால்வாடிக்கையாளரின் எதிர்பார்ப்புகள்  திருப்தி அளிக்கப்படாவிட்டால்  எந்த விளம்பர  தந்திரமும்  நிலைக்காது.

ஐம்பது  பைசாவுக்கும்  சாக்கலேட்  கிடைக்கும், பத்து ரூபாய்க்கும்  சாக்கலேட் கிடைக்கும். எதிர்பார்ப்புகள்தான் வித்தியாசம். தினசரி வாழ்வில்  ஒரே பணியை செய்யக்கூடிய  சாதனங்கள் , பொருட்கள், சேவைகள்  நிறையவே வந்து  விட்டன அவை எந்த அளவுக்கு வாடிக்கையாளரை  திருப்தி  செய்கிறது.?அதிக விலை கொடுத்து  வாங்குவதுதான்  பொருளின் தரத்துக்கு  உத்தரவாதம்என்ற வாதம்சரியல்ல. தரம் என்பது  உற்பத்தி  செய்பவரால்  மட்டும் நிர்ணயிக்கப்  படுவதல்ல வாடிக்கை யாளரை  திருப்திப்  படுத்துவதே  தரத்தின்  முக்கிய பணி.
                  
நாம் நமக்கு அடுத்தவரை வாடிக்கையாளராக கருதத் தொடங்கினால் நம்முடைய
வாழ்க்கை  தரமுள்ளதாக  அமையும்.என்பது சொல்லாமலேயே விளங்கும்

இனி தரம் பற்றிய திரு. மர்ஃபியின் கருத்துக்களைப் பகிர்கிறேன்

1.உற்பத்தியில் ஏதாவது தவறு விளைவதாயிருந்தால்அது விளைந்தே தீரும்....!

2ஒரு உற்பத்திக் குவியலில் இருக்கும் தரமற்ற பொருள் சிறந்த வாடிக்கையாளருக்குப் போகும்.

3. தரமற்ற பொருள் என்று கண்டுபிடிக்கப் பட்டால் அதற்கான விலைஅதை விற்றவருக்கு ஏற்கனவே போயிருக்கும்

4. உற்பத்தியாகும் பொருளின் தரக் குறைவு அதைக் கண்டுபிடிக்கும் முந்தைய ஸ்டேஜில் நடந்திருக்கும்.

5.தரம் பற்றிய புரிதல் மிகக் குறைவாய் உள்ளவர்கள் அதை நிர்ணயிக்கும் விற்பனைப் பிரிவினரும் R&D பிரிவினருமாய் இருப்பார்கள்.

6.தரம் பற்றி அதிகம் குறைபட்டுக் கொள்கிற மேலாளரும் அதிகாரிகளும் அது பற்றிய புரிதல் சிறிதும் இல்லாதவர்களே.

7. ஒரு விலை உயர்ந்த பொருள் அதில் இருக்கும் விலை மிகக் குறைந்த சிறு பாகத்தால் பாதிப்படைந்து பழுதாகும்.

8. தரம் பற்றிய வகுப்புக்கு வர வேண்டியவர்கள் அப்போதுதான் தரக் குறைவான பொருளுக்காக  வேறெங்காவது மும்முரமாய்  fire fighting  செய்து கொண்டிருப்பார்கள்..

9.எந்த விற்பனையாளன் வாடிக்கை யாளரைக் குளிர்விக்க அதிகமாக ட்ரீட் செய்கிறானோ. அந்த விற்பனையாளனுக்கு தரம் பற்றிய அறிவே குறைவாய் இருக்கும்.

10. இந்த அதிக விலை மதிப்புள்ள டெக்னாலொஜி. காலத்தில் ஏதாவது தவறு நேர்ந்திருக்க வேண்டுமானால் அது ஏற்கனவே நிகழ்ந்ததாயிருக்கும்

11.தவறு நேர்வது இயற்கை, அதற்கு வருந்துவது டிவைன், தொடர்ந்து தவறு செய்வது  devilish.

மேலே சொல்லப் பட்டிருக்கும் கருத்துக்கள் தமாஷாக உரைக்கப் பட்டிருக்கும் அசல் உண்மைகள்.

முந்தைய பதிவில் திரு துளசிதரன் ISI மற்றும் ISO பற்றிக்கேட்டிருந்தார். அவற்றை பிறிதொரு சமயம் பதிவிடுகிறேன். ஆனால் அதற்கு முன் தரம் என்றால் என்ன என்று தெளிவிக்கவே இந்தப் பதிவு.